కెనడాలోని మిస్సిసాగా నగర మేయర్ పదవికి పోటీ చేస్తున్న ఆంధ్ర మూలాలున్న దీపికా దామెర్ల వినూత్న ప్రచారంతో వార్తల్లో నిలిచారు. ప్రముఖ బాలీవుడ్ పాట ‘క్యా హువా తేరా వాదా’కు కొత్త సాహిత్యం జోడించి, తాను గెలిస్తే ఆస్తి పన్నులు పెంచబోనని హామీ ఇచ్చారు. ఈ ప్రచార వీడియోను Xలో పంచుకోవడంతో వైరల్‌గా మారింది. దీపికా దామెర్ల 2018లో మిస్సిసాగా సిటీ కౌన్సిల్‌కు వార్డ్‌ 7 నుంచి ఎన్నికయ్యారు. అంతకుముందు ఏడేళ్ల పాటు ఒంటారియో ప్రావిన్షియల్ పార్లమెంట్ సభ్యురాలిగా పనిచేశారు. ఆ సమయంలో అసోసియేట్ ఆరోగ్య, దీర్ఘకాలిక సంరక్షణ శాఖ మంత్రిగా, సీనియర్ వ్యవహారాల మంత్రిగా బాధ్యతలు నిర్వహించారు. ఎన్నికల ప్రచారంలో భారతీయ సినీ పాటను ఉపయోగించడం ఇప్పుడు చర్చనీయాంశంగా మారింది.