అమెరికా: ఉత్తర అమెరికాలో తెలుగు సంస్కృతి, సంప్రదాయాలు ఉట్టిపడేలా పలు సాంస్కృతిక, సామాజిక కార్యక్రమాలు కోలాహలంగా సాగుతున్నాయి. ఒకవైపు షార్లెట్‌లో ‘తెలుగు సంబరాలు 2026’ అట్టహాసంగా జరగ్గా, మరోవైపు మిషిగన్‌లో నాట్స్ (NATS) నూతన చాప్టర్ ఘనంగా ప్రారంభమైంది.
షార్లెట్ తెలుగు సంబరాలు 2026: అలరించిన సాంస్కృతిక ప్రదర్శనలు, సైన్స్ ఫెస్ట్
అమెరికాలోని షార్లెట్ నగరంలో నిర్వహించిన ‘షార్లెట్ తెలుగు సంబరాలు 2026’ వేడుకలు విజయవంతంగా ముగిశాయి. చిన్నారులు, యువత, పెద్దలు ప్రదర్శించిన శాస్త్రీయ సంగీతం, నృత్య రూపకాలు, ఫ్రీస్టైల్ డ్యాన్స్‌లు ప్రేక్షకులను విశేషంగా ఆకట్టుకున్నాయి.
ఈ వేడుకల్లో సైన్స్ ఫెస్ట్ ప్రత్యేక ఆకర్షణగా నిలిచింది. ఇందులో భాగంగా 9 శాస్త్రీయ అంశాలను ప్రయోగాలు, డెమోన్స్ట్రేషన్ల ద్వారా చిన్నారులకు వినూత్నంగా పరిచయం చేశారు. ముఖ్యంగా డ్రై ఐస్ ప్రయోగాలు, ప్లాస్మా బాల్ ప్రదర్శనలు పిల్లలను, తల్లిదండ్రులను ఎంతగానో అలరించాయి.
ఈ కార్యక్రమానికి తానా (TANA), జీటీఏ (GTA), ఆప్టా (APTA) వంటి ప్రముఖ తెలుగు సంస్థలు భాగస్వామ్యం వహించగా, నాట్స్ (NATS) అధ్యక్షుడు రాజ్ అల్లాడా ముఖ్య అతిథిగా హాజరయ్యారు. ఈ సందర్భంగా సుమారు 800 కొత్త రిజిస్ట్రేషన్లు నమోదైనట్లు నిర్వాహకులు వెల్లడించారు. కార్యక్రమ విజయంలో కీలక పాత్ర పోషించిన కళాకారులు, చిన్నారులు, తల్లిదండ్రులు, వాలంటీర్లు, స్పాన్సర్లు, సంస్థల ప్రతినిధులకు నిర్వాహక కమిటీ ప్రత్యేక కృతజ్ఞతలు తెలిపింది.
మిషిగన్‌లో నాట్స్ (NATS) నూతన చాప్టర్ ఆరంభం
తెలుగు సంస్కృతి పరిరక్షణ, సేవా కార్యక్రమాల విస్తరణ, యువత భాగస్వామ్యాన్ని ప్రోత్సహించే లక్ష్యంతో నార్త్ అమెరికన్ తెలుగు సొసైటీ (నాట్స్) తన నూతన ‘మిషిగన్ చాప్టర్’ను ఫార్మింగ్టన్ హిల్స్‌లో ఘనంగా ప్రారంభించింది.
నూతన కార్యవర్గ నియామకం:
- చాప్టర్ కోఆర్డినేటర్: శ్రీదేవి మణేపల్లి
- జాయింట్ కోఆర్డినేటర్: మహి బొల్లవరం
- ఈవెంట్స్ & లాజిస్టిక్స్: రవి చాలంటి
- ట్రెజరర్: హేమ సూరపరాజు
- సభ్యత్వ బాధ్యతలు: జ్యోతి జవ్వాది
- పబ్లిక్ రిలేషన్స్ & మీడియా: అనుపమ దివాకర్ల
ఈ సందర్భంగా నాట్స్ చైర్మన్ కిషోర్ కంచర్ల మాట్లాడూతూ.. సంస్థ అందిస్తున్న హెల్ప్‌లైన్ సేవలు, కష్టాల్లో ఉన్న తెలుగు వారికి లభిస్తున్న సహాయ సహకారాల గురించి వివరించారు. నాట్స్ అధ్యక్షుడు రాజ్ అల్లాడా మాట్లాడుతూ.. సమాజ సేవకే నాట్స్ నిరంతరం కట్టుబడి ఉంటుందని పునరుద్ఘాటించారు.
ప్రముఖులకు సత్కారం – సాంస్కృతిక కోలాహలం
ఈ వేడుకలో వివిధ రంగాల్లో విశేష సేవలు అందించిన ప్రముఖులను నాట్స్ ప్రతినిధులు ఘనంగా సత్కరించారు. మనోరమ గాంధీ, కూచిపూడి కళా ప్రోత్సాహకురాలు సంధ్య శ్రీ ఆత్మకూరి, ‘మనబడి’ తెలుగు భాషా కార్యక్రమ ప్రతినిధులు, సామాజిక సేవకుడు సన్నీ రెడ్డి, వైద్య, సినీ రంగాల్లో సేవలు అందిస్తున్న డాక్టర్ హరినాథ్ పోలిచెర్లలను ఈ సందర్భంగా గౌరవించారు. స్థానిక విద్యార్థులు ప్రదర్శించిన కూచిపూడి నృత్యాలు సభను ఆకట్టుకున్నాయి.
ఈ కార్యక్రమంలో ఆప్టా, డెట్రాయిట్ తెలుగు అసోసియేషన్, డెట్రాయిట్ తెలంగాణ కమ్యూనిటీ, ఇండియన్ ఓవర్సీస్ కాంగ్రెస్ ప్రతినిధులు కూడా పెద్ద సంఖ్యలో పాల్గొన్నారు.
భవిష్యత్ ప్రణాళికలు:
మహిళల ఆరోగ్యం, సాధికారత, యువ నాయకత్వం, క్రీడలు, కుటుంబ కార్యక్రమాలు, భాషా సంస్కృతుల పరిరక్షణే ధ్యేయంగా మిషిగన్ చాప్టర్ పనిచేస్తుందని నిర్వాహకులు తెలిపారు. ఇందులో భాగంగా ప్రతి మూడు నెలలకు కనీసం ఒక ప్రధాన సామాజిక సేవా కార్యక్రమాన్ని నిర్వహించాలని నిర్ణయించినట్లు స్పష్టం చేశారు.
(పీఆర్ఓ: జీకే మీడియా గణేష్ – కుమార్)