జూలై 31 నుంచి ఆగస్టు 2 వరకు మూడు రోజుల పాటు అంగరంగ వైభవంగా మహాసభలు
-Swamy Muddam
బాల్టిమోర్ (MediaBoss Network): ఉత్తర అమెరికాలోని తెలుగు ప్రజల అతిపెద్ద సంస్థల్లో ఒకటైన అమెరికన్ తెలుగు అసోసియేషన్ (ఆటా) ఆధ్వర్యంలో నిర్వహించనున్న 19వ ఆటా కాన్ఫరెన్స్ & యూత్ కన్వెన్షన్ కోసం అమెరికాలోని బాల్టిమోర్ నగరం సర్వాంగ సుందరంగా ముస్తాబవుతోంది. వేలాది మంది ప్రవాస తెలుగు ప్రముఖులు, వ్యాపారవేత్తలు, వైద్యులు, పారిశ్రామికవేత్తలు, కళాకారులు, విద్యార్థులు, యువత ఒకే వేదికపై కలుసుకునే ఈ మహాసభలను కనివినీ ఎరగని స్థాయిలో నిర్వహించేందుకు అన్ని ఏర్పాట్లు పూర్తవుతున్నాయని ఆటా కార్యవర్గం వెల్లడించింది.
దాదాపు 70 కమిటీలు, వందలాది మంది వాలంటీర్లు నెలల తరబడి రేయింబవళ్లు శ్రమించి ఈ మహాసభలను చిరస్మరణీయంగా తీర్చిదిద్దుతున్నారని ఆటా అధ్యక్షుడు జయంత్ చల్ల తెలిపారు. ప్రపంచవ్యాప్తంగా ఉన్న తెలుగు ప్రజలను ఒకే వేదికపైకి తీసుకురావడమే ఈ మహాసభల ప్రధాన లక్ష్యమని ఆయన పేర్కొన్నారు.
35 ఏళ్ల సేవా ప్రస్థానం
1991లో స్థాపించబడిన ఆటా సంస్థ ఈ ఏడాదితో 35 ఏళ్ల సేవా ప్రస్థానాన్ని పూర్తి చేసుకుంటోంది. మూడు దశాబ్దాలుగా అమెరికాలోని తెలుగు ప్రజలకు సాంస్కృతిక, సామాజిక, విద్యా, వైద్య, సేవా కార్యక్రమాల ద్వారా విశేష సేవలందిస్తూ విశ్వసనీయ సంస్థగా గుర్తింపు పొందింది.
ప్రవాస భారతీయులకు అండగా నిలవడంతో పాటు విపత్తుల సమయంలో సహాయక చర్యలు చేపట్టడం, యువతకు నాయకత్వ అవకాశాలు కల్పించడం, విద్య, వైద్యం, వ్యాపార రంగాల్లో మార్గదర్శకత్వం అందించడం వంటి కార్యక్రమాల్లో ఆటా కీలక పాత్ర పోషిస్తోంది. అలాగే ఆటా ఫౌండేషన్ ద్వారా భారతదేశంలో వరదలు, కోవిడ్ వంటి విపత్కర పరిస్థితుల్లో సహాయక చర్యలు, విద్యా, వైద్య సేవలను కూడా విస్తృతంగా నిర్వహిస్తోంది.
బిజినెస్ సమ్మిట్ ప్రత్యేక ఆకర్షణ
ఈసారి నిర్వహించే బిజినెస్ కాన్ఫరెన్స్ ప్రధాన ఆకర్షణగా నిలవనుంది. ప్రముఖ పారిశ్రామికవేత్తలు, ఇన్వెస్టర్లు, స్టార్టప్ వ్యవస్థాపకులు, వ్యాపారవేత్తల సమక్షంలో బి-టు-బి మ్యాచ్‌మేకింగ్, ఎగ్జిక్యూటివ్ నెట్‌వర్కింగ్ సెషన్స్, మెర్జర్స్ అండ్ అక్విజిషన్స్ ఫోరం, ఐడియా బజ్ వంటి వినూత్న కార్యక్రమాలు నిర్వహించనున్నారు. కొత్త వ్యాపార అవకాశాలు అన్వేషించే వారికి, పెట్టుబడులు ఆకర్షించాలనుకునే స్టార్టప్‌లకు ఇది అత్యుత్తమ వేదికగా నిలవనుందని నిర్వాహకులు తెలిపారు.
వైద్య సదస్సుల్లో కృత్రిమ మేధపై చర్చ
వైద్య రంగానికి సంబంధించిన సీఎంఈ (Continuing Medical Education) కాన్ఫరెన్స్‌లో ఆర్టిఫిషియల్ ఇంటెలిజెన్స్ ప్రభావం, గుండె జబ్బులు, మధుమేహం, క్యాన్సర్ పరిశోధనల్లో తాజా పరిణామాలు, ఆధునిక వైద్య సాంకేతికతపై ప్రముఖ నిపుణులు చర్చించనున్నారు.
సాంస్కృతిక వైభవానికి పెద్దపీట
ఈ మహాసభల్లో సాంస్కృతిక కార్యక్రమాలకు విశేష ప్రాధాన్యం కల్పించారు. శ్రీ శివపార్వతుల కళ్యాణం ప్రధాన ఆకర్షణగా ఉండనుండగా, నిరావల్ బ్యాండ్ లైవ్ కాన్సర్ట్, ఫ్యాషన్ షో, ఆటా బ్యూటీ పేజెంట్, యూత్ ఫ్యాషన్ షో, అష్టావధానం, సాహిత్య సదస్సులు, యూత్ క్రూయిజ్, ఆటా మ్యాట్రిమోనీ వంటి కార్యక్రమాలు ప్రేక్షకులను అలరించనున్నాయి.
అమెరికాలో పుట్టి పెరిగిన తెలుగు యువతతో పాటు ఉన్నత విద్య, ఉద్యోగాల కోసం అమెరికాకు వచ్చిన యువతకు పరిచయ వేదికగా ఆటా మ్యాట్రిమోనీ ప్రత్యేక అవకాశాన్ని కల్పించనుంది.
భారీ ఎగ్జిబిషన్ – మినీ మాల్ తరహాలో
కాన్ఫరెన్స్ ప్రాంగణంలో మినీ మాల్‌ను తలపించేలా భారీ ఎగ్జిబిషన్‌ను ఏర్పాటు చేస్తున్నారు. నగలు, రియల్ ఎస్టేట్, విద్య, ఆరోగ్యం, ఆర్థిక సేవలు, టెక్నాలజీ తదితర రంగాలకు చెందిన వందలాది వెండర్ బూత్‌లు సందర్శకులను ఆకట్టుకోనున్నాయి. కుటుంబ సమేతంగా వచ్చిన వారికి షాపింగ్‌తో పాటు సమాచారాన్ని అందించేలా ప్రత్యేకంగా రూపకల్పన చేశారు.
తెలుగు ప్రతిభకు ప్రపంచ వేదిక
ప్రపంచ నలుమూలలలో ఉన్న తెలుగు వారి ప్రతిభను ప్రపంచానికి పరిచయం చేయడంలో ఆటా కీలక పాత్ర పోషిస్తోందని ఆటా అధ్యక్షుడు జయంత్ చల్ల పేర్కొన్నారు. ఉత్తర అమెరికాలోని తెలుగు కుటుంబాలందరూ ఈ మహాసభలకు హాజరై విజయవంతం చేయాలని ఆయన పిలుపునిచ్చారు.
ఆటా కాన్ఫరెన్స్ కన్వీనర్ శ్రీధర్ బాణాల మాట్లాడుతూ, మూడు రోజుల పాటు అన్ని వయస్సుల వారికి నచ్చేలా విభిన్న కార్యక్రమాలను రూపొందించామని, ప్రతి ఒక్కరూ కుటుంబ సమేతంగా పాల్గొని ఈ మహాసభలను విజయవంతం చేయాలని ఆహ్వానించారు.
జూలై 31 నుంచి ఆగస్టు 2 వరకు అమెరికాలోని బాల్టిమోర్ నగరంలో జరిగే ఈ ఆటా 19వ కాన్ఫరెన్స్ తెలుగు సంస్కృతి, సేవా కార్యక్రమాలు, వ్యాపార అవకాశాలు, యువతకు మార్గదర్శకత్వం, ప్రపంచ తెలుగు ఐక్యతకు మరో మైలురాయిగా నిలవనుందని నిర్వాహకులు ఆశాభావం వ్యక్తం చేశారు.
