పాలకుర్తి మండల కేంద్రంలోని తెలంగాణ సాంఘిక సంక్షేమ గురుకుల పాఠశాలలో ఎలుకల బెడదతో విద్యార్థినులు ఇబ్బందులు ఎదుర్కొన్నారు. గురువారం రాత్రి హాస్టల్‌లో నిద్రిస్తున్న పలువురు విద్యార్థినులను ఎలుకలు కరవడంతో చేతులు, కాళ్లకు గాయాలయ్యాయి. అస్వస్థతకు గురైన విద్యార్థినులను శుక్రవారం హాస్టల్ సిబ్బంది ఆసుపత్రికి తరలించి చికిత్స అందించారు. హాస్టల్‌లో ఎలుకల బెడద తీవ్రంగా ఉందని, గత కొద్ది రోజులుగా సిబ్బంది దృష్టికి తీసుకెళ్లినా పట్టించుకోలేదని విద్యార్థినులు ఆరోపించారు. ఘటనపై తల్లిదండ్రులు ఆందోళన వ్యక్తం చేస్తున్నారు.