▪️ పాల్గొన్న త్రిదండి చినజీయర్ స్వామి, కేంద్ర మంత్రి కిషన్ రెడ్డి, మంత్రులు ఎమ్మెల్యేలు, ప్రముఖులు.
▪️ తెలంగాణ సంస్కృతి, అభివృద్ధిపై 2 రోజుల పాటు అట్టహాసంగా చర్చలు, వేడుకలు.
▪️ రాష్ట్రంలోని అన్ని జిల్లాల్లో ‘GTA చాప్టర్ల’ ఏర్పాటు.
హైదరాబాద్: ప్రపంచవ్యాప్తంగా విస్తరించి ఉన్న తెలంగాణ బిడ్డలను ఒకే వేదికపైకి చేర్చి, మాతృభూమి అభివృద్ధిలో వారిని భాగస్వాములను చేయడమే లక్ష్యంగా గ్లోబల్ తెలంగాణ అసోసియేషన్ (GTA) నిర్వహించిన ‘GTA మెగా కన్వెన్షన్ 2025’ అత్యంత వైభవంగా జరిగింది. గండిపేట పరిధిలోని అక్షయ కన్వెన్షన్లో శని, ఆదివారాల్లో నిర్వహించిన ఈ వేడుకలు తెలంగాణ ఆత్మగౌరవాన్ని, ఐక్యతను చాటిచెప్పాయి.
ఆధ్యాత్మిక, రాజకీయ ప్రముఖుల సమక్షంలో..
ఈ మహాసభలకు ఆధ్యాత్మిక గురువులు శ్రీశ్రీశ్రీ త్రిదండి చినజీయర్ స్వామి, హంపి పీఠాధిపతి శ్రీశ్రీశ్రీ విరూపాక్ష విద్యారణ్య భారతి స్వామి విచ్చేసి ఆశీస్సులు అందజేశారు. ముఖ్య అతిథిగా హాజరైన కేంద్ర మంత్రి కిషన్ రెడ్డితో పాటు రాష్ట్ర మంత్రి వివేక్ వెంకటస్వామి, ఎంపీ చామల కిరణ్ కుమార్ రెడ్డి, ఎమ్మెల్సీ బల్మూరి వెంకట్, ఎమ్మెల్యేలు మల్లారెడ్డి, జగదీశ్వర్ రెడ్డి, కాటిపల్లి వెంకటరమణా రెడ్డి, పైడి రాకేష్ రెడ్డి, పాల్వాయి హరీష్ బాబు, మాజీ మంత్రులు శ్రీనివాస్ గౌడ్, పెద్దిరెడ్డి తదితర ప్రముఖులు పాల్గొన్నారు.
ఒక వేడుక కాదు.. ఒక మహోద్యమం!
ఈ సందర్భంగా జీటీఏ ఫౌండర్ అండ్ గ్లోబల్ చైర్మన్ అలుమల్ల మల్లారెడ్డి మాట్లాడుతూ.. “ఈ కన్వెన్షన్ కేవలం ఒక వేడుక మాత్రమే కాదు, తెలంగాణ భవిష్యత్తు కోసం ప్రవాస భారతీయుల మేధస్సును, వనరులను అనుసంధానం చేసే ఒక మహోద్యమం” అని పేర్కొన్నారు. సుమారు 30 దేశాల నుండి వేలాది మంది ప్రతినిధులు ఈ సభకు హాజరుకావడం విశేషం.
ప్రధాన ఆకర్షణలు ఇవే:
జిల్లాల వారీగా చాప్టర్లు: తెలంగాణలోని అన్ని జిల్లాల్లో GTA కార్యకలాపాలను విస్తరిస్తూ కొత్త చాప్టర్లను ప్రారంభించి, వాటి కార్యవర్గాలను ఈ వేదికపై పరిచయం చేశారు.
తెలంగాణ రైజింగ్ 2047: 2047 నాటికి రాష్ట్ర అభివృద్ధి, గ్లోబల్ పెట్టుబడుల ఆహ్వానంపై మేధోమథనం నిర్వహించారు.
సాంస్కృతిక ప్రదర్శనలు: మంగ్లీ, మోహన భోగరాజు, మిట్టపల్లి సురేందర్ వంటి ప్రముఖ కళాకారుల పాటలు, 100 మందికి పైగా కళాకారులతో జానపద, శాస్త్రీయ నృత్య ప్రదర్శనలు ఆహూతులను అలరించాయి.
విజ్ఞాన సెషన్లు: స్టార్టప్లు, రియల్ ఎస్టేట్, ఎన్ఆర్ఐ లీగల్ ఇష్యూస్ మరియు ఆరోగ్య రంగంలో వస్తున్న మార్పులపై నిపుణులతో ప్రత్యేక చర్చలు జరిగాయి.
జీటీఏ ఇండియా ప్రెసిడెంట్ శ్రీనివాస్ రెడ్డి పాడురి, ప్రెసిడెంట్ ఎలక్ట్ కంకణాల అభిషేక్ రెడ్డి, అడ్వైజరీ చైర్ ప్రతాప్ రెడ్డి పెండ్యాల, సహ వ్యవస్థాపకుడు శ్రవణ్ రెడ్డి పాడురు, వాషింగ్టన్ ప్రెసిడెంట్ రాము ముండ్రాతి తదితరులు ఈ వేడుకల విజయవంతంలో కీలక పాత్ర పోషించారు. కొత్త నాయకత్వ ప్రమాణ స్వీకారం, లైఫ్టైమ్ అచీవ్మెంట్ అవార్డుల ప్రదానంతో ఈ మెగా ఈవెంట్ దిగ్విజయంగా ముగిసింది.