హైదరాబాద్: ఐటీ రంగంలో నూతన ఆవిష్కరణలకు ఊపిరి పోస్తూ స్టార్టప్లను ప్రోత్సహించడంలో అమెరికా తెలుగు అసోసియేషన్ (ATA) చేస్తున్న కృషి అభినందనీయమని పలువురు ఐటీ రంగ ప్రముఖులు ప్రశంసించారు. రెండు తెలుగు రాష్ట్రాల్లో ఆటా ఆధ్వర్యంలో నిర్వహిస్తున్న ‘ఆటా వేడుకలు–2025’ కార్యక్రమాల్లో భాగంగా, ఇన్స్టిట్యూషన్స్ ఇన్నోవేషన్ కౌన్సిల్ (విద్యాశాఖ) మరియు ఐఐటీ హైదరాబాద్ సహకారంతో శనివారం ఐఐటీ హైదరాబాద్ క్యాంపస్లోని కన్వెన్షన్ సెంటర్ ఆడిటోరియంలో ‘ఆటా స్టార్టప్ పిచ్ డే’ కార్యక్రమాన్ని ఘనంగా నిర్వహించారు.
ఈ కార్యక్రమం ద్వారా స్టార్టప్ వ్యవస్థాపకులు, పెట్టుబడిదారులు, విద్యా సంస్థలు, ఐటీ నిపుణులను ఒకే వేదికపైకి తీసుకువచ్చి వినూత్న ఆలోచనలకు దిశానిర్దేశం చేయడం, నిధుల అవకాశాలు కల్పించడం, గ్లోబల్ నెట్వర్క్ను నిర్మించడం లక్ష్యంగా ఆటా ముందడుగు వేసింది.
దేశంలో వేగంగా విస్తరిస్తున్న స్టార్టప్ ఎకోసిస్టం
ఈ కార్యక్రమానికి ముఖ్య అతిథిగా హాజరైన మైతీ స్టార్టప్ హబ్ (ఎలక్ట్రానిక్స్ & ఇన్ఫర్మేషన్ టెక్నాలజీ మంత్రిత్వ శాఖ) సీఈఓ డా. పన్నీర్సెల్వం (పీఎస్) మదనగోపాల్ మాట్లాడుతూ, దేశంలో స్టార్టప్ ఎకోసిస్టం వేగంగా విస్తరిస్తోందని తెలిపారు. కేంద్ర ప్రభుత్వం అమలు చేస్తున్న విధానాలు, మైతీ స్టార్టప్ హబ్ అందిస్తున్న సహకారం వల్ల యువ ఇంజనీర్లు, యువ উদ্যములకు విస్తృత అవకాశాలు లభిస్తున్నాయని చెప్పారు. టెక్నాలజీ ఆధారిత ఆవిష్కరణలే భవిష్యత్ ఆర్థిక వృద్ధికి పునాదని, కృత్రిమ మేధ (AI) భవిష్యత్కు నూతన నాంది పలుకుతుందని స్పష్టం చేశారు.
స్టార్టప్ల సవాళ్లు–అవకాశాలపై ప్యానెల్ చర్చ
ఈ సందర్భంగా ‘స్కేలింగ్ స్టార్టప్స్: ఛాలెంజెస్ అండ్ ఆపర్చునిటీస్’ అంశంపై జరిగిన ప్యానెల్ చర్చ ప్రత్యేక ఆకర్షణగా నిలిచింది. ఈ చర్చలో డా. పన్నీర్సెల్వం మదనగోపాల్తో పాటు ఐఐటీ హైదరాబాద్ ప్రొఫెసర్, కో–ఇన్నోవేషన్ అండ్ హెడ్ ఆఫ్ రీసెర్చ్/ఇన్నోవేషన్ అవుట్రీచ్ రమేష్ లోగనాథన్, సునేరా గ్రూప్ వ్యవస్థాపకుడు రవి రెడ్డి, డల్లాస్ వెంచర్ క్యాపిటల్ భాగస్వామి కిరణ్ చంద్ర కళ్లూరి, ఐఐటీ హైదరాబాద్ మెటీరియల్స్ సైన్స్ ప్రొఫెసర్ ముద్రిక ఖండేల్వాల్ పాల్గొన్నారు.
స్టార్టప్లు ఎదగడంలో ఎదురయ్యే సవాళ్లు, పెట్టుబడుల సమీకరణ, మార్కెట్ విస్తరణ, టెక్నాలజీ వాణిజ్యీకరణ, గ్లోబల్ భాగస్వామ్యాలపై వారు తమ విలువైన అభిప్రాయాలను పంచుకున్నారు.
ఉత్తమ స్టార్టప్ల ఎంపిక
పిచ్ డేలో పాల్గొన్న స్టార్టప్లు తమ వ్యాపార ఆలోచనలు, ఉత్పత్తులు, సేవలను న్యాయనిర్ణేతల ముందు వివరించాయి. రవి రెడ్డి, కిరణ్ తనికెళ్ల, కిరణ్ చంద్ర కళ్లూరి, శ్రీధర్ రంపల్లి, రాజేష్ కోసూరి, రఘురామన్ రామమూర్తి, పార్థసారధి కరంసెట్టి, జీవన్ కరంసెట్టి, ప్రసాద్ వడ్డాది, వెంకటేశం బి, భారవి కొడవంటి, వేను మాధవ్ వొడ్నాల న్యాయనిర్ణేతలుగా వ్యవహరించి ఉత్తమ స్టార్టప్లను ఎంపిక చేశారు.
ఆటా నాయకుల ప్రసంగం
ఈ కార్యక్రమాన్ని ఉద్దేశించి ఆటా ప్రెసిడెంట్ జయంత్ చల్లా, ఎలెక్ట్ ప్రెసిడెంట్ సతీష్ రామసహాయం రెడ్డి మాట్లాడుతూ, పవర్హౌస్, పేవ్స్టోన్, సక్సీడ్ ఇన్నోవేషన్, డల్లాస్ వెంచర్ క్యాపిటల్ సంస్థలు అందించిన సహకారానికి కృతజ్ఞతలు తెలిపారు. ఉత్తమ స్టార్టప్లకు నిధుల అవకాశాలు, మెంటార్షిప్, పరిశ్రమల అనుసంధానం కల్పించడమే లక్ష్యంగా ఈ పిచ్ డే నిర్వహించామని చెప్పారు. భారతదేశం–అమెరికా మధ్య స్టార్టప్ సహకారాన్ని మరింత బలోపేతం చేయడంలో ‘ఆటా స్టార్టప్ పిచ్ డే’ కీలక మైలురాయిగా నిలుస్తుందని ఆశాభావం వ్యక్తం చేశారు.
ప్రముఖుల పాల్గొనడం
ఈ కార్యక్రమంలో ఆటా బోర్డు ఆఫ్ ట్రస్టీలు, కో–చైర్ నరసింహ ద్యాసాని, సాయి సూదిని, శ్రీకాంత్ గుడిపాటి, ఆటా కాన్ఫరెన్స్ కన్వీనర్ శ్రీధర్ బాణాల, ట్రస్టీలు కాశీ కొత్త, రామకృష్ణ అల, శ్రీధర్ తిరిపతి, మాజీ అధ్యక్షులు పరమేష్ భీమ్ రెడ్డి, బిజినెస్ చైర్ హరీష్ బత్తిని, రఘువీర్ మర్రిపెద్ది, వినోద్ కోడూరు, కిషోర్ గూడూరు, నర్సి రెడ్డి, విష్ణు మాధవరం, సుమ ముప్పల, తిరుమల్ రెడ్డి, రాజ్ కరకల, వేణు నక్షత్రం, లక్ష్ చేపూరి, సుమన్ బర్ల, వేణుగోపాల్ సంకినేని, మీడియా సలహాదారు ఈశ్వర్ బండా తదితరులు పాల్గొన్నారు.