తిరుమల శ్రీవారి ఆలయంలో నవంబర్ 16న పుష్పయాగ మహోత్సవాన్ని శాస్త్రోక్తంగా నిర్వహించేందుకు టీటీడీ ఏర్పాట్లు చేస్తోంది. ఇందుకు ముందురోజైన నవంబర్ 15న సా. 6 నుంచి రాత్రి 8 గంటల వరకు అంకురార్పణ కార్యక్రమం నిర్వహించనున్నారు. పుష్పయాగం రోజున రెండో అర్చన, గంట, నైవేద్యం అనంతరం శ్రీదేవి, భూదేవి సమేత మలయప్పస్వామి ఉత్సవమూర్తులను సంపంగి ప్రదక్షిణంలోని కల్యాణ మండపానికి తీసుకెళ్తారు. పాలు, పెరుగు, తేనె, చందనం, పసుపు తదితర సుగంధ ద్రవ్యాలతో స్నపన తిరుమంజనం నిర్వహించనున్నారు. అనంతరం వివిధ రకాల పుష్పాలతో స్వామివారికి విశేష పూజలు సమర్పించనున్నారు.