తిరుమల: శ్రీవేంకటేశ్వరస్వామివారి సాలకట్ల బ్రహ్మోత్సవాల ముగింపు ఘట్టమైన చక్రస్నానాన్ని మంగళవారం ఉదయం వైభవంగా నిర్వహించారు. శ్రీ సుదర్శన చక్రత్తాళ్వార్లకు స్వామివారి పుష్కరిణిలో పవిత్ర స్నానం చేయించారు. ఈ సందర్భంగా వేలాది మంది భక్తులు పుష్కరిణిలో పుణ్యస్నానాలు ఆచరించి ఆధ్యాత్మిక అనుభూతిని పొందారు. లోకక్షేమం, సకల జీవరాశుల శ్రేయస్సును కాంక్షిస్తూ నిర్వహించిన ఈ పవిత్ర కార్యక్రమంతో బ్రహ్మోత్సవాలు ముగిశాయి. చక్రస్నానానికి ముందు తెల్లవారుజామున 3 నుంచి 6 గంటల వరకు స్వామివారి పల్లకీ ఉత్సవాన్ని నిర్వహించారు.