‘‘అయ్యలారా.. అమ్మలారా.. సుట్టాలారా.. దోస్తులారా.. మా ఇంట్ల లగ్గం ఖాయమైంది. యాది మరవకుండచ్చి.. మా పిల్లపిల్లగాణ్ని దీవించాలె’’ అంటూ తెలంగాణ యాసలో ముద్రించిన పెళ్లి పత్రిక నెట్టింట వైరల్గా మారింది. పెద్దపల్లి జిల్లా పెగడపల్లికి చెందిన అల్లం మల్లమ్మ, గట్టయ్య దంపతుల కుమారుడు వెంకటేష్ వివాహం సౌమ్యతో నేడు జరుగుతోంది. ఈ పెళ్లి ఆహ్వాన పత్రికను పూర్తిగా తెలంగాణ మాండలికంలో ముద్రించారు. రోజూ మాట్లాడుకునే స్థానిక యాసలో పెళ్లి పిలుపు ఉండటంతో బంధువులు, స్థానికులు ఆసక్తిగా చదువుతూ ఫిదా అవుతున్నారు. తెలంగాణ సంస్కృతి, మట్టివాసనను ప్రతిబింబించేలా ఉన్న ఈ ఆహ్వాన పత్రిక వైరల్గా మారింది.
