హైదరాబాద్ నగరంలో మంగళవారం నాడు వాహనదారులు తీవ్ర ఇబ్బందులు ఎదుర్కొన్నారు. అనేక పెట్రోల్ బంకులు 'నో స్టాక్' బోర్డులు పెట్టి మూసివేయడంతో, తెరిచి ఉన్న కొన్ని బంకుల వద్ద కిలోమీటర్ల మేర క్యూలు కనిపించాయి. ఇంధనాన్ని అక్రమంగా నిల్వ చేసినా, బ్లాక్ మార్కెట్‌కు తరలించినా కఠిన చర్యలు తీసుకుంటామని, వదంతులను నమ్మవద్దని, ఆందోళన చెందవద్దని హైదరాబాద్ పోలీస్ కమిషనర్ సజ్జనార్ 'X' వేదికగా విజ్ఞప్తి చేశారు. నగరంలో ఇంధన నిల్వలు పుష్కలంగా ఉన్నాయని, పరిస్థితిని నిరంతరం సమీక్షిస్తున్నామని ఆయన తెలిపారు. సమాచారం కోసం 1967 టోల్ ఫ్రీ నంబర్‌ను సంప్రదించాలని అధికారులు సూచించారు.