వచ్చే ఎన్నికల్లో వరంగల్‌ తూర్పు నియోజకవర్గం నుంచే పోటీ చేసి విజయం సాధించి మళ్లీ మంత్రి అవుతానని రాష్ట్ర మంత్రి కొండా సురేఖ ధీమా వ్యక్తం చేశారు. వరంగల్‌ తూర్పు నియోజకవర్గ కార్యకర్తలతో కొండా సురేఖ, కొండా మురళి సమావేశమయ్యారు. ఈ సందర్భంగా తాము పార్టీ మారుతారంటూ వస్తున్న ఊహాగానాలకు సురేఖ తెరదించారు. ఎప్పుడూ విలువలకు కట్టుబడి రాజకీయాలు చేశామని ఆమె స్పష్టం చేశారు. తెలంగాణలో కాంగ్రెస్‌ పార్టీని మరోసారి అధికారంలోకి తీసుకురావడమే లక్ష్యంగా ముందుకు సాగుతామని తెలిపారు. వచ్చే ఎన్నికల్లో వరంగల్‌ తూర్పు టికెట్‌ తనకే వస్తుందని, ప్రజల ఆశీర్వాదంతో మరోసారి గెలిచి మంత్రి పదవి చేపడతానని సురేఖ పేర్కొన్నారు.