అమరావతి రాజధాని ప్రాంతంలో కీలక ఘట్టం ఆవిష్కృతం అయింది. ప్రతిష్టాత్మకంగా నిర్మించిన సీడ్ యాక్సెస్ ఇ-3 రోడ్ ని సీఎం చంద్రబాబు ప్రారంభించారు. మొత్తం 3 దశల్లో రూ.1,519 కోట్లతో ఇ-3 రోడ్డు నిర్మాణం జరిగింది. 21.77 కి.మీ.పొడవు, 60 మీటర్ల వెడల్పుతో ఇ-3 రోడ్డు నిర్మించారు. నేటి నుంచి సీడ్ యాక్సెస్ రోడ్డుపై రయ్.. రయ్ మంటూ వాహనాలు పరుగులు పెట్టనున్నాయి. వివిధ సవాళ్లను ఎదుర్కొని నిర్మాణం పూర్తయింది. ఫేజ్-1 దొండపాడు నుంచి MSR ఆశ్రమం వరకు 14.35 కి.మీ, ఫేజ్-2 వెంకటపాలెం నుంచి ఉండవల్లి వరకు 3.92 కి.మీ దూరం ఉంది. ఫేజ్ 3 ఉండవల్లి నుంచి మణిపాల్ ఆసుపత్రి వరకు 3.5 కి.మీ ఉంటుంది. రాజధాని రవాణా వ్యవస్థకు కీలకంగా సీడ్ యాక్సెస్ రోడ్డు నిలవనుంది. విజయవాడ-మంగళగిరి రహదారితో అనుసంధానం ఏర్పడింది. బకింగ్ హమ్ కెనాల్ పై 478 మీటర్ల పొడవున స్టీల్ బ్రిడ్జ్ నిర్మించారు. రూ.82 కోట్లతో స్టీల్ బ్రిడ్జ్ నిర్మించారు. కృష్ణా కరకట్ట ట్రాఫిక్ కష్టాలకు సీడ్ యాక్సెస్ రోడ్డుతో చెక్ పడనుంది.