బ్రిటన్‌ వలస పాలన నుంచి విముక్తి పొంది 1776 జులై 4న ఏర్పడిన అమెరికా, రెండున్నర శతాబ్దాల ప్రయాణంలో ప్రపంచ అగ్రరాజ్యంగా ఎదిగింది. వలసల సామాజిక ప్రయోగంగా మొదలై... సాంకేతిక, పారిశ్రామిక, అంతరిక్ష ఆవిష్కరణలతో అజేయ శక్తిగా మారింది. 1898-1945 మధ్య జరిగిన యుద్ధాల అనంతరం అంతర్జాతీయంగా పెద్దన్న పాత్రను దక్కించుకుంది. ఈ నాణేనికి మరోవైపు... తీవ్రమైన ధనిక-పేద అంతరాలు, అంతరించని జాతివివక్ష, గన్ కల్చర్ వంటి అంతర్గత సవాళ్లు నేటికీ దేశాన్ని వేధిస్తూనే ఉన్నాయి. అపారమైన అవకాశాలు, అదే సమయంలో హెచ్చరించే ఊబి లాంటి ఈ భిన్న పార్శ్వాల కలయికే అమెరికా 250 ఏళ్ల కథ.