తెలంగాణలో నిరుపేద కుటుంబాల పిల్లలకు ప్రైవేటు పాఠశాలల్లో ఉచిత విద్య అందించే అంశంపై కదలిక మొదలైంది. విద్యాహక్కు చట్టంలోని సెక్షన్‌ 12(1)(సి) ప్రకారం ప్రైవేటు పాఠశాలల్లో ప్రవేశ స్థాయిలో 25% సీట్లను బలహీన వర్గాల పిల్లలకు కేటాయించాలి. ఈ అంశంపై సుప్రీంకోర్టు స్పందించడం, జాతీయ బాలల హక్కుల పరిరక్షణ సంఘం వివరణ కోరడంతో పాఠశాల విద్యాశాఖలో కదలిక వచ్చినట్లు తెలుస్తోంది. గతంలో ప్రభుత్వ పాఠశాలలు లేని 96 ఆవాసాల్లోని పిల్లలకు ప్రైవేటు బడుల్లో ప్రవేశాలు కల్పించాలని ప్రభుత్వం నిర్ణయించింది. అయితే 2025–26, 2026–27 విద్యా సంవత్సరాల్లో కలిపి కేవలం 180 మందికే ఉచిత ప్రవేశాలు లభించినట్లు విద్యాశాఖ సమాచారం వెల్లడిస్తోంది.